தொற்றுநோய் பரவும் அபாயம் – அதிகாரிகள் நடவடிக்கை எடுப்பார்களா?
தூத்துக்குடி மாவட்டம், ஏரல் வட்டம், ஆழ்வார்திருநகரி ஒன்றியத்திற்கு உட்பட்ட மூக்குப்பீறியில் இருந்து மணிநகர் மற்றும் ஞான்ராஜ் நகர் செல்லும் சாலையோரங்களில் குப்பைகள் அதிக அளவில் கொட்டப்பட்டு, மலைபோல் குவிந்து காணப்படுகின்றன. இதனால் அப்பகுதியில் சுகாதாரச் சீர்கேடு ஏற்படும் அபாயம் உருவாகியுள்ளதாக பொதுமக்கள் கவலை தெரிவிக்கின்றனர்.
சாலையோரங்களில் தேங்கிக் கிடக்கும் குப்பைகளால் துர்நாற்றம் வீசுவதுடன், கொசுக்கள் மற்றும் ஈக்கள் பெருகி, தொற்றுநோய்கள் பரவும் சூழல் ஏற்படுமோ என்ற அச்சம் அப்பகுதி மக்களிடையே நிலவுகிறது. மேலும், இவ்வழியாகச் செல்லும் பொதுமக்களும் வாகன ஓட்டிகளும் சிரமத்திற்கு உள்ளாகின்றனர்.
எனவே, நோய்கள் பரவும் அபாயத்தைத் தவிர்க்கும் வகையில், சம்பந்தப்பட்ட ஊராட்சி நிர்வாகம் மற்றும் சுகாதாரத் துறை அதிகாரிகள் உடனடியாக நடவடிக்கை எடுத்து, சாலையோரங்களில் குவிந்துள்ள குப்பைகளை அகற்ற வேண்டும் எனப் பொதுமக்கள் கோரிக்கை விடுத்துள்ளனர்.
மேலும், மூக்குப்பீறி கிராமத்தின் அனைத்துத் தெருக்களிலும் முறையாகக் குப்பைகளைச் சேகரிக்க ஏற்பாடு செய்வதுடன், மீண்டும் சாலையோரங்களில் குப்பைகள் கொட்டப்படுவதைத் தடுக்க உரிய நடவடிக்கைகள் மேற்கொள்ள வேண்டும் என்றும் பொதுமக்கள் வலியுறுத்தியுள்ளனர்.
பொதுமக்களின் சுகாதாரத்தையும் சுற்றுச்சூழலையும் பாதுகாக்க, சம்பந்தப்பட்ட அதிகாரிகள் விரைந்து நடவடிக்கை எடுப்பார்களா? என்பதே அப்பகுதி மக்களின் எதிர்பார்ப்பாக உள்ளது.
